Terían Brasserie
Um okkur
Terían er hlýlegur og smekklegur veitingastaður á einu flottasta horni Akureyrar – á neðstu hæð Hótel Kea, við rómaðar kirkjutröppurnar. Við leggjum áherslu á létta og heiðarlega matargerð þar sem fersk hráefni fá að njóta sín, með innblæstri frá franskri og ítalskri matarmenningu.
Nafnið sækir staðurinn í veitingahús sem þetta sögufrægasta hótel bæjarins rak um árabil í sama rými og eldri sem yngri Akureyringar þekkja vel.
Terían er systurstaður Múlabergs Bistro&Bar, sem er staðsettur á hæðinni fyrir ofan.
Sama teymi stendur að stöðunum tveimur en Terían opnaði í júlí 2024 eftir gríðarlegar framkvæmdir og breytingar á húsnæðinu.
Terían býður upp á morgunverðarhlaðborð alla morgna, brunch (e.dögurð) og hádegisverð í hádeginu & létta en klassíska rétti á kvöldin.
Terían & Múlaberg eru ótrúlega heppin með einstakt og metnaðarfullt teymi fagmanna sem hlakka til að koma gestum á óvart í mat&drykk á nýjan máta í nýju umhverfi.
LISTAVERKIN Á TERÍUNNI & LISTAKONAN
Unnur Stella Níelsdóttir er listakona frá Akureyri sem vinnur meðal annars með málverk, keramík og hönnun.
Hún lærði myndlist og keramík í Flórens og hönnun á Spáni og starfar í dag úr vinnustofu sinni, Start Studio, á Akureyri.
Verk Unnar Stellu einkennast af sterkum litum og leikandi myndheimi. Fyrir Téríuna Brasserie skapaði hún sérhannaða vegglist sem er hluti af karakter og upplifun staðarins.
Hægt er að fylgjast með verkum Unnar Stellu á Instagram @startstudio.is.
Vegglistin á Teríunni
Fyrir Terían Brasserie skapaði Unnur Stella sérhannaða vegglist sem varð hluti af karakter og upplifun staðarins. Verkin, sem meðal annars má finna á veggjum og salernum veitingastaðarins, einkennast af litríkum og persónulegum myndheimi hennar.
Með verkunum færir hún sinn eigin sjónræna heim inn í rýmið og skapar þannig tengingu milli listar, matar, samveru og upplifunar. Vegglistin er ekki aðeins hugsuð sem skreyting heldur sem hluti af andrúmslofti staðarins — eitthvað sem gestir geta uppgötvað og notið sem hluta af heimsókn sinni.
Unnur Stella ákvað að mála eitt stórt borðhald á veggnum fyrir framan inngangana á baðherbergin. Í huganum skapaði hún sér litla sögu um það sem hafði gerst – dýrin sem birtast inni á baðherbergjunum höfðu sloppið úr fjósinu og átt saman gott kvöld á flótta.
Þau höfðu greinilega verið í miklu stuði, því borðhaldið var skilið eftir á hvolfi áður en þau flúðu inn á baðherbergin til að fela sig fyrir bændunum sem voru á eftir þeim.
Verkið er því eins konar lítil saga sem gestir geta uppgötvað smám saman þegar þeir skoða rýmið.
